रेसुङ्गा नगरपालिकाद्धारा प्रमुख प्रशासकिय अधिकृतलाई बिदाई तथा नयाँलाई स्वागत

सूर्य सुनार भदौ १३ गुल्मी

रेसुङ्गा नगरपालिकामा प्रमुख प्रशासकिय अधिकृतहरुको स्वागत तथा फेरी भेटौला कार्यक्रम सम्पन्न भएको छ । जिल्लाको रेसुङ्गा नगरपालिकामा झन्डै चार वर्ष नगरपालिकामा प्रमुख प्रशासकिय अधिकृतको रुपमा कार्य सम्पादन गर्नुभएको भक्तिराम मरासिनीलाई सोमबार सम्मान सहित बिदाई गरिएको हो । त्यस्तै वर्तमान प्रमुख प्रशासकिय हरिप्रसाद अर्याललाई स्वागत गरिएको नगरपालिकाका सुचना अधिकारी शंकरप्रसाद गौतमले जानकारी दिए ।

कार्यक्रममा रेसुङ्गा नगरपालिकाका नगरप्रमुख खिलध्वज पन्थीले प्रमुख प्रशासकिय अधिकृतको जिम्मेवारीमा रहेर नगरपालिकाको कार्य सम्पादनमा राम्रो काम गरेको भन्दै पूर्व प्रमुख प्रशासकिय अधिकृत भक्तिराम मरासिनीलाई धन्यवाद व्यक्त गरे । साथै उनले आगमी कार्यकाल अझै फलदायीहोस् भनी शुभकामना व्यक्त गरेका छन । वर्तमान प्रमुख प्रशासकिय अधिकृत हरिप्रसाद अर्याललाई स्वागत गर्दै नगरप्रमुख पन्थीले कर्मचारीहरुले मुस्कान सहितको सेवा जनतालाई प्रवाह गर्न आग्रह गरेका छन । उनले नागरिकहरुलाई मुस्कान सहितको सेवा प्रवाह गर्न सके स्थानीय सरकारलाई जनताले महशुस गर्ने विश्वास व्यक्त गरे ।

कार्यक्रममा रेसुङ्गा नगरपालिकाकी उपप्रमुख अमृतादेवी कुवँरले वर्तमान प्रमुख प्रशासकिय अधिकृतलाई स्वागत गर्दै पूर्व प्रमुख प्रशासकिय अधिकृत भक्तिराम मरासिनीले नगरपालिका भित्र रहेर गरेको कामको प्रशंसा गरिन ।
रेसुङ्गा नगरपालिकाका पूर्व प्रमुख प्रशासकिय अधिकृत भक्तिराम मरासिनीले आफ्नो चार वर्षको कार्यकाल नगरपालिकामा सम्झिन योग्य भएको दाबी गरेका छन । नगरपालिकाबाट प्रदान गरिने सेवामा कुनै प्रकारको गुनासो नआएको हुँदा आफ्नो कार्यकाल सफल भएको मरासिनीले दाबी गरेका छन । जनप्रतिनिधी र कर्मचारीको उदेश्य जनतालाई खुशी र समृद्धी बनाउने भएको भन्दै मर्म बुझेर कर्मचारीहरुले कार्य सम्पादन गर्नुपर्ने उनले बताए । कर्मचारीले राजनितिक दलका भन्दा बहिर रहेर कार्य गर्नुपर्नेमा मरासिनीले जोड दिएका छन । रेसुङ्गा नगरपालिकाका वर्तमान प्रमुख प्रशासकिय अधिकृत हरिप्रसाद अर्यालले स्थानीय सरकार जनताको नजिकको सरकार भएको हुँदा सेवाग्राहीको मर्म अनुसार काम गर्नुपर्ने उल्लेख गरे । रेसुङ्गा नगरपालिकाले नीति तथा कार्यक्रम ल्याउदा राम्रो र जनताको पक्षमा लिएको हुँदा त्यसलाई कार्य सम्पादन गर्न आफु सहित सिङ्गो कर्मचारी लागि पर्ने अर्यालले बताए । कार्यक्रममा नगरप्रमुख, उपप्रमुख, प्रमुख प्रशासकिय अधिकृत, वडाध्यक्षहरु, कार्यपालिका सदस्य, कर्मचारीहरु र पत्रकारको उपस्थित रहेको थियो ।