ग्वाघा माध्यमिक विद्यालयमा ‘पढ्दै कमाउँदै’ कार्यक्रम

महेश बोहरा चैत्र २१, गुल्मी

गुल्मी  जिल्लाको चन्द्कोट गाउँपालिका वडा नम्बर ५ मा अवस्थित ग्वाघा माध्यमिक विद्यालयले ‘पढ्दै कमाउँदै’ कार्यक्रम अन्तर्गत च्याउ, लसुन, गोभी खेती तथा अन्य व्यावसायिक कृषि उत्पादन सुरु गरेको छ। विद्यालय परिसरभित्र उपलब्ध जमिनलाई उपयोग गरी कृषि शिक्षासँगै व्यवहारिक सीप प्रदान गर्ने उद्देश्यले यो कार्यक्रम सञ्चालन गरिएको हो।

विद्यालयका प्रधानाध्यापक प्रकाश  थापाका अनुसार, विद्यार्थीलाई कृषि तथा उद्यमशीलता सम्बन्धी व्यवहारिक ज्ञान प्रदान गर्दै आत्मनिर्भर बनाउने लक्ष्य लिइएको छ।  विद्यालय व्यवस्थापन समितिका अध्यक्ष लिलबहादुर राना, विद्यालयका कृषि फोकल पर्सन सन्तोष घर्ती, शिक्षक तथा कर्मचारी  २२ जना एवं करिब ७० जना विद्यार्थीको उपस्थितिमा कार्यक्रम सम्पन्न भएको   थियो।

उत्पादित च्याउ, लसुन, गोभी तथा अन्य कृषि सामग्री बजारमा बिक्री गरिने छ, र त्यसबाट भएको आम्दानी विद्यालयको विद्यार्थी कल्याणकारी कोषमा संकलन गरिनेछ। विद्यालय व्यवस्थापन समितिका अध्यक्ष लिलबहादुर रानाका अनुसार, यस कोषमा जम्मा भएको रकम आर्थिक रूपमा कमजोर विद्यार्थीलाई कपी, कलम, पोशाक तथा अन्य शैक्षिक सामग्री उपलब्ध गराउन प्रयोग गरिन्छ। हाल सो कोषमा रु. २० हजार रुपैयाँ जम्मा भएको  विद्यालयले जनाएको छ।
विद्यालय प्रशासनले आगामी दिनमा कृषि कार्यक्रमलाई अझ विस्तार गर्दै उत्पादन वृद्धिका साथै विद्यालयलाई आत्मनिर्भर बनाउने लक्ष्य राखेको छ। यस कार्यक्रमले बिद्यार्थीहरुलाइ पनि सिक्दै कमाउदै कार्यक्रममा आकर्षण गरेको छ ।